親父へのアーグ-下地勇

家(やー)んかい来(き゚)すちか むぬうばゆまん

肴(うさい)やカチューぬ刺身(なます)とぅ アース゚ぬ塩煮(まーすにー)

ビール小(がも)を呑(ぬ)み テレビやNHK

薄暗(あやうう゚ぁ)ーちぬ二番座(にばんざー)ん居(うー)てぃ

ただ二度(ふたん)どぅ笑(あま)いす゜だき

お父(とう)や恐(うとぅる)すかんち

いっう゚ぃー回(まあ)りうたー幼少頃(やらびぱだ)まい

今(んなま)なりば懐(なつ)すむぬ

我等(ばんた)まいどぅ年(とぅす)う取(とぅ)いきしゅう

今日(きゅう)がーまーすぬ疲(ぶが)りや 門口(ぞうふつ)ん降(う)らしてぃ

明日(あっつぁ)ぬ心配(しば)まい無(にゃあ)ん振(ふ)す゜ばしーどぅ

ビール小(がも)えお呑(ぬ)みーうー

いつ世(ゆー)がみまい NHKや出(い)でぃうーば

いつ世(ゆー)がみまい ビールまい刺身小(なますがま)まいありうーば

いつ世(ゆー)がみまい 年(とぅす)さ取(とぅ)らばんまい ゆぬむぬやば

いつ世(ゆー)がみまい 頑張(がんづぅ)かりー うりふぃーるよ

自分(どぅー)が一人(たけふー)しどぅ

成長(ぶどぅ)いたーんぎ顔(みぱな)をしー

ブーギ゚なぎ゚加勢(かしい)やーつ

繁多(ぱんた)かーばちどぅ逃(ぴん)ぎばーき回(まあ)り

子(ふふぁ)ぬきゃあ めーげーやーつ見いだな

自分(どぅー)が道(んつ)ゆーばきどぅ

歩(あす)きーうー

あんしうすけー父母(す゚さ゚んま)

七十(ななじゅう)歳んかいどぅなりーどぅ

一度(ぴすとぅん)ち座(び)し゚ちか

何ちやにゃーん んな一度(ぴすとぅん)立たん

太陽(てぃだ)ぬ憩(ゆく)いば ぴょーす小(がま)んな膝(つぐす)う撫(な)でぃ

今日(きゅう)捕(とぅ)いき゚たー魚(いす゚ぅ)う

子(ふふぁ)ぬきゃぬむてぃちどぅ

段ボールんかい込(く)みーうー

いつ世(ゆー)がみまい

父母(す゚さ゚んま)や家ん居す゚ むぬちどぅ思(うむ)いどぅうー

いつ世(ゆー)がみまい

ビール小(がも)を 呑(ぬ)みゅうむちどぅ思(うむ)いうー

いつ世(ゆー)がみまい ブーギ゚う植(い)びうーぱずちどぅ思(うむ)いうー

いつまい我等子(ばんたふふぁ)ぬきゃあ自分勝手(どぅーかってぃ)んどぅ

かんし思(うむ)いうー

サニツぬ シナかじ アガス゜ザー御嶽(うたき)ぬ ザーグル

ズガキ゚浜(ばま)ぬ ウガンバーリー

十五夜(じゅうぐや)ぬ シーサータース

時代(ずだい)や変(かあ)りーぴらばん 年(とぅす)取(とぅ)いぴらばん

いつ世(ゆー)がみまい 忘(ばっし)やならんむぬぬ ありうーはず

いつ世(ゆー)がみまい

山羊(ぴんざ)ぬ草(ふそ)を刈(か)りうり お父(とう)

いつ世(ゆー)がみまい

舟小(ふにがま)ん乗(ぬう)り 魚(いす゚)捕(とぅ)いふり

いつ世(ゆー)がみまい 段ボールん入し゚魚(いす゚)う送(うく)ふぃーる

いつ世(ゆー)がみまい 頑張(がんづう)かり うりふぃーるよ

いつ世(ゆー)がみまい NHKや出(い)でぃうーば

いつ世(ゆー)がみまい ビールまい刺身小(なますがま)まいありうーば

いつ世(ゆー)がみまい 年(とぅす)さ取(とぅ)らばんまい ゆぬむぬやば

いつ世(ゆー)がみまい 頑張(がんづぅ)かりー うりふぃーるよ

発売日:2012-02-22

歌手:下地勇

作詞:下地勇

作曲:下地勇